Зәйдә хәрби хезмәткә егетләрнең беренче төркеме 10 ноябрьдә китәчәк

Зәйдә хәрби хезмәткә һәр чакырылыш саен булачак солдатлар көнен үткәрү традициясе яши. Армия яшенә җиткән егетләрне, аларның әти-әниләрен, якыннарын, өлкән буын вәкилләрен чакырып, хәрби тормыш нечкәлекләре, элекке белән бүгенгене чагыштыру, җаваплы бурычны үтәүнең мөһимлеге турында тагын бер кат искәртү, сөйләшү, һичшиксез, егетләребезгә хәрби хезмәтнең җитдилеген аңларга стимул бирә. Кичә шәһәрнең “Энергетик” Мәдәният сараенда быелгы көзге чакырылышта Россия Кораллы көчләре сафына басарга җыенучыларга да менә шундый хәер-фатиха бирелде.
Көзге чакырылышта Зәй төбәгеннән армия сафларына тагын 100гә якын егет китәр дип исәпләнелә. Күпчелек егетләр безнең район шефлыгындагы Әстерхан өлкәсе хәрби частьларына озатылачак. Хәзерге вакытта биредә 22 яшь зәйле хезмәт итә, тиздән аларга тагын 30 кеше өстәләчәк.