«Бердәм Россия» көне» үтте

10 июньдә 6нчы мәктәптә "Бердәм Россия" сәяси партиясе көне" үтте. Аның кысаларында Яңа шәһәрдә "Агачның гомерен саклап кал!" экологик акция игълан ителеп, халыктан макулатура җыю оештырылды. Бу чарада "Мефро уилз Руссия - Зәй заводы" (җитәкчесе И. Р. Давыдов) 526,248 килограмм макулатура тапшырып, беренче урынны яулады, «Апрель» ҖЧШ (А. Ә. Таҗиев), 2нче һәм 6нчы мәктәпләр (Т. В. Биккинина һәм С. А. Кузнецов) актив катнашты. Акциядә барлыгы 1500 килограммнан артык макулатура җыелды. Димәк, 15 агачны саклап калдык. Яңа шәһәр микрорайонында медицина хезмәткәрләре урынга чыгып, сәламәтлеген тикшертергә теләүчеләргә кайбер төр медицина тикшерүләре уздырды, шәһәр урамнары буйлап йөгерү марафоны үтте, балалар һәм яшьләр өчен кул эшләренә өйрәнү буенча мастер-класслар күрсәтелде, 6нчы мәктәптә депутатлар, төрле хезмәт күрсәтү оешмалары җитәкчеләре урынга чыгып, халык соравы буенча кабул итүләр оештырды, соңыннан бер-дәмроссиялеләр җыелышы узды. Бүгенге көндә "Бердәм Россия" сәяси партиясенең Зәй җирле бүлеге 3288 партия әгъзасын берләштерә. Партия сафлары артуга бара. Соңгы ике елда 37 кеше партия әгъзасы итеп кабул ителгән.