Өмә узды, эш дәвам итә

Гомумшәһәр шимбә өмәсе районда зур оешканлык белән узды. Урам-парк, скверларда иртән үк җанлылык хөкем сөрде. Һәр оешма-предприятие үзенә билгеләнгән биләмәне тәртипкә китерде, чүп-чардан арындырды. Күмәк көч таулар күчерә.
Без - район газеталары хезмәткәрләре өмә көнне Ялчыгол урамын тәртипкә китердек. Әлеге урамда, кибетләр урнашу, үзәк базар булу сәбәпле, чүп-чар җитәрлек.
Бу көнне Ринат Фәрдиев исемендәге ял паркын гадәттәгечә район Советы, башкарма комитет бүлекләрендә хезмәт куючылар җыештырды, чүп-чар шунда ук машиналарга төяп озатылды. Ленин урамын исә "Инвестстройсервис" җаваплылыгы чикләнгән ширкәте җыештырды, агачларны акшарлады. Трасса буендагы паркларны мәктәп укучылары тәртипкә китерде. Кыскасы, урам, парк, сквер, җәмәгать биналары, предприятие-учреждение биләмәләрен җыештыруда биш меңгә якын кеше катнашты, җыелган чүпне чыгаруга 38 берәмлек техника тартылып, полигонга 130 куб метр чүп озатылды. Бер көндә генә кыш буе чүпләнгән биләмәләрдә тәртип урнаштыру мөмкин эш түгел. Санитар чистарту айлыгы дәвам итә, чәршәмбе өмәләрендә дә актив катнашып, шәһәр-авылларны тәртипкә китерик.