Ялчыголның бай мирасы

Казанда милли китапханәдә якташыбыз, дин галиме Таҗетдин Ялчыголның "Рисаләи Газизә" китабын тәкъдим итү булды. Чарага дин әһелләре, галимнәр, язучылар, аерым алганда, Хатыйп Миңнегулов, Фәрит Яхин, Сәлим Гыйләҗетдинов, Фоат Галимуллин, Рамил Исламов, Фәридә Хәсәнова һәм башкалар чакырылды. Китап "Хузур" нәшрият йорты тарафыннан нәшер ителгән. Әсәрне басмага танылган галим Хатыйп Миңнегулов әзерләгән. «Ри-саләи Газизә»нең яңа басмасы Диния нәзарәте игълан иткән 2014 - Дини гореф-гадәтләрне торгызу елы кысаларында бабаларыбызның рухи мирасын торгызу, бүгенге буынга кайтару ниятеннән басылды. Чарада имам-мөхтәсиб Сәгыйть хәзрәт Камалов, Зәйдә яшәүче Ялчыгол нәселе вәкилләре дә катнашты.