Оешуына 50 елдан артык

6 апрель Россия Федерациясе Эчке эшләр министрлыгының җинаятьләрне ачу органы хезмәткәрләре көне буларак билгеләп үтелә. Нәкъ менә шушы көнне 1963 елда СССР Югары Советы Президиумы указы белән җинаятьләрне ачу бүлеген оештыру карар ителә. Зәйдә җинаятьләрне ачу бүлеге, Чаллы эчке эшләр бүлегенең бер бүлекчәсе буларак, 1963 елда барлыкка килә.
Бүгенге көндә район эчке эшләр бүлегенең җинаятьләрне ачу бүлекчәсе белән юстиция подполковнигы Галия Җиһаншина
җитәкчелек итә. Аның кул астында җинаятьләрне ачу буенча 11 кеше эшли. Барысы да югары юридик белемгә ия. Бүлектә һәр тикшерүчегә аерым төр җинаять эшләрен алып бару йөкләнгән. Гомумән алганда, алар Җинаять кодексында каралган 140 төрдән артык хокук бозу буенча җентекле эзләү-тикшерү эшләре үткәреп, суд каравына тапшыра. Районда аеруча авыр җинаятьләр сирәк кылына. Ә менә урлашу, талауга бәйле хокук бозулар белән тикшерүчеләргә еш очрашырга туры килә.