Зәйдә социаль хезмәт алучыларны Халыкара хатын-кызлар көне белән котлыйлар

Халыкара хатын-кызлар көне ел саен 8 мартта билгеләп үтелә һәм хатын-кызларга, аларның казанышларына һәм җәмгыятькә керткән өлешләренә багышланган бәйрәм булып санала. Бу көнне гаиләдә һәм җәмгыятьтә хатын-кыз роленең мөһимлеген ассызыклап, әниләргә, апаларга, дус кызларга һәм хезмәттәшләргә рәхмәт белдерү кабул ителгән. 4 март көнне Зәй шәһәренең «Радость» үзәге белгечләре якынлашып килүче бәйрәм уңаеннан «Россия хатын – кызлары-гүзәллек һәм көч!» дип исемләнгән чара уздырды. Балалы әниләр өчен бай программа әзерләнгән иде: Кунаклар хатын-кызның матурлыгы, назлылыгы һәм көче символына әверелгән бәйрәмнең тарихын белделәр,уңай хис-кичерешләр һәм күтәренке рух тудырган күңелле бәйгеләрдә һәм уеннарда катнаштылар. Кичә оригиналь бүләк ясау буенча иҗади мастер-класс белән тәмамланды. Һәр әни балалар куллары белән яратып ясалган уникаль сувенир алды. Без барлык катнашучыларга рәхмәт белдерәбез! Һәр көн шулай ук шатлыклы һәм якты хисләр белән тулы булсын!