Зәйдә яңа туган балалар өчен беренче кирәкле әйберләрне бушлай прокатка алырга мөмкин
Зәйдә «Радость» халыкка социаль хезмәт күрсәтү үзәге базасында яңа туган балалар өчен беренче кирәкле әйберләрне прокатка бирү пункты эшли. Проект «Гаилә» милли проекты кысаларында тормышка ашырыла һәм балалы яшь гаиләләрнең тормыш сыйфатын яхшыртуга юнәлдерелгән.
Түләүсез нигездә прокатка коляска, карават, ходунка, чана, пеленаль өстәл һәм ашату өчен урындык алырга мөмкин. Бу бала туу белән бәйле гаиләләргә башлангыч финанс йөкләнешен сизелерлек киметергә мөмкинлек бирәчәк.
Прокат хезмәтләреннән түбәндәге критерийларга туры килгән гаиләләр файдалана ала:
• Югары уку йортларының һәм һөнәри көллиятләрнең көндезге бүлекләрендә 25 яшькә кадәрге студентлар (ата-аналары икесе дә студентлар булу шарты белән);
• Ата-аналарының яше 30 яшьтән артмаган күпбалалы гаиләләр;
• Ялгыз аналар яки ялгыз әтиләр.
Хезмәтне рәсмиләштерү өчен кайбер шартларны үтәргә кирәк: РФ гражданлыгы булу, Зәй районында яшәүне теркәү, балага пособие алу һәм салым бурычлары булмау.
Зәй муниципаль районында яшәүче күп балалы әни Сиринә Әхмәтҗанова прокат пункты хезмәтләреннән беренчеләрдән булып уңышлы файдаланды, ул балалар өчен уңайлы карават, ходунка, кышкы коляска һәм ашату өчен урындык алды.
«Радость» үзәгендә, шул исәптән 8(85558)2-84-65 телефоны буенча, яңа туган балалар өчен беренче кирәк булган әйберләрне прокат пунктыннан бушлай файдалану мөмкинлеге турында өстәмә мәгълүмат алырга мөмкин.