Музыкаль мәктәп Муса Җәлилнең юбилеен концерт белән билгеләп үтте
«Яшьләр һәм балалар» милли проектын гамәлгә ашыру кысаларында, балалар музыка мәктәбендә «Тормыш. Иҗат. Сугыш» - дип аталган, күренекле татар шагыйре, Советлар Союзы Герое һәм Ленин премиясе лауреаты Муса Җәлилнең туган көненә багышланган чара узды. Ул Зәй шәһәренең 2 нче урта гомуми белем бирү мәктәбенең 3 сыйныф укучылары өчен оештырылды.
Концертның максаты кече сыйныф укучыларын бөек совет язучысының тормышы һәм иҗаты белән таныштырудан гыйбарәт иде. Программага шагыйрь үзе язган музыкаль композицияләр, Җәлил әсәрләре белән илһамланган заманча композиторлар әсәрләре, шулай ук Бөек Ватан сугышы геройларының хәрби батырлыклары турында хикәяләр кертелгән иде.
Концертны оештыручы, югары категорияле педагог Елена Александровна Коклина мондый форматтагы чараларның мөһимлеген ассызыклады: «Безгә балаларны үз халкыбыз мәдәнияте белән таныштыру мөһим, чөнки үз Ватаныбыз тарихын белү патриотизм һәм үз иле өчен горурлык хисе тәрбияли. Без балаларга сәнгать һәм әдәбиятка мәхәббәт тәрбияләргә, иҗади сәләтләрне һәм рухи кыйммәтләрне үстерергә телибез».
Чара дусларча атмосферада узды һәм яшь тамашачылар арасында зур кызыксыну уятты. Балалар Муса Җәлилнең «Кул яулык», «Яшь ана», «Май» кебек танылган шигырьләре белән таныштылар. Укучылар фашистлар төрмәсендә һәлак булган, әмма безгә бай әдәби мирас калдырган шагыйрьнең фаҗигале язмышы турында сөйләделәр.
Педагогия коллективы мондый мәдәни чаралар традициягә әйләнер һәм яшь талантлар иҗатын алга таба үстерүгә ярдәм итәр, дигән ышаныч белдерде. Концерт үсеп килүче буынның эстетик зәвыгын һәм әхлакый ориентирларын формалаштыруда мөһим этап булды, илебез патриотларын тәрбияләү өчен мәдәни мирасның әһәмиятен күрсәтте.