Район башлыгы Бөек Ватан сугышы ветеранын Ватанны саклаучылар көне белән котлады

Бүген Ватанны саклаучылар көне алдыннан, район башлыгы Разиф Гали улы Кәримов Бөек Ватан сугышында катнашкан, энергетика тармагы ветераны, Зәй муниципаль районының Мактаулы гражданы Леонид Яковлевич Мачтаковның өендә булды. Разиф Гали улы ветеранны якынлашып килүче бәйрәм белән котлады, аңа ныклы сәламәтлек, тормышка сүнмәс кызыксыну, күңел күтәренкелеге, туганнары һәм якыннары ягыннан мәхәббәт һәм игътибар теләде. Энергетиклар исеменнән ветеранны Зәй ГРЭСы директоры урынбасары Рамил Габдулла улы Галиуллин котлады. Ветеран II дәрәҗә «Ватан сугышы» ордены, «Батырлык өчен», «Сталинград оборонасы өчен», «Сугышчан казанышлар өчен» медальләре белән бүләкләнгән, Югары Башкомандующий И.В. Сталин имзасы белән җиде грамотасы бар. Леонид Мачтаков Зәй ГРЭСЫ энергетикларының күп буыннары өчен остаз булып тора. Хөрмәтле ветеранга сәламәтлек һәм күңел күтәренкелеге телибез.