Зәйдә "Балкыш" фестиваленең сайлап алу туры узды

10 февральдә балалар музыка мәктәбендә 2025-2026 елларда Татарстан Республикасы ветераннары ( пенсионерлары) төбәк иҗтимагый оешмасының 40 еллыгына багышланган "Балкыш" Татарстан Республикасы ветераннары арасында үзешчән башкаручыларның 9 Республика фестиваленең сайлап алу туры узды. Әлеге фестивальнең максаты - күпмилләтле Татарстан Республикасының өлкән яшьтәге гражданнарының иҗади потенциалын ачу, аларның актив озак яшәве, социаль интеграциясе һәм яшь тернәкләнүе өчен шартлар тудыру, "көмеш" яшьтәге кешеләрне мәдәни тормышка җәлеп итү, шулай ук яшь буыннарга Татарстан халыкларының мөһим рухи-әхлакый һәм мәдәни кыйммәтләрен һәм традицияләрен тапшыру. Сайлап алу турында катнашучыларны район башлыгы Р.Г. Кәримов исеменнән ветераннар Советы рәисе Алексей Алексеев сәламләде һәм уңышлы чыгышлар теләде. Алексей Васильевич шулай ук үзешчән артистларга актив тормыш позицияләре өчен рәхмәт белдерде. Сайлап алу турында 28 конкурсант катнашты. Номинацияләр төрле иде: вокаль ансамбльләр, ялгыз җырлау, нәфис сүз, хореография. Барлык катнашучыларны фестиваль дипломнары белән бүләкләделәр, ә иң яхшы номерлар фестивальнең Әлмәттәге зона этабында тәкъдим ителәчәк.