Район башлыгы ТР икътисад министрлыгы коллегиясе утырышында катнашты

Бүген Казанда Татарстан Республикасы Рәисе Рөстәм Миңнеханов катнашында Татарстан Республикасында социаль-икътисадый тотрыклылыкны тәэмин итү буенча Оператив штабның һәм Татарстан Республикасы икътисад министрлыгы коллегиясенең уртак утырышы узды. Утырыш эшендә район башлыгы Р.Г. Кәримов катнашты. Көн тәртибендәге төп мәсьәлә - 2025 ел йомгаклары һәм 2026 елга Татарстан Республикасының Социаль-икътисадый үсеш бурычлары турында Татарстан Республикасы вице-премьеры - икътисад министры Мидхәт Шаһиәхмәтов чыгышы тыңланды. Шунысы куанычлы, аның докладында Зәй муниципаль районы аерым игътибарга лаек булды. Икътисад министры узган ел район территориясендә биотехнологияләр үстерүгә махсуслашкан «Яшел Үзән» МИЗ төзелүе турында сөйләде. Россия Хөкүмәте ярдәме белән 4 резидент яңа махсус икътисадый зона территориясендә проектларны гамәлгә ашыра башлады. Проектларга кертемнәр күләме 7 млрд сумнан артык тәшкил итәчәк. Төп докладта шулай ук 2026 елда Татарстанда милли проектларны гамәлгә ашыру, СВО ветераннарына комплекслы ярдәм күрсәтү һәм аларны эшлекле активлыкка җәлеп итү, республиканың тармак чылбырында җитештерү процессларын оптимальләштерүнең төп инструментлары һ. б. турында сөйләнде.