Зәйдә "КЭС -БАСКЕТ" мәктәп баскетболы төбәк финалына йомгак ясалды

8 февральдә хәлиткеч матчлар шәһәребезнең 7 нче урта мәктәбендә узды. Кызлар арасында алтын медальләр өчен Кукмараның 4 нче урта мәктәбе һәм Зәйнең 7 нче урта мәктәбе баскетболчылары көрәште. Бу көчләр буенча тигез командалар уены иде. Очрашуның соңгы секундына кадәр паркетта киеренке көрәш барды. Нәтиҗәдә Кукмараның 4 нче урта мәктәбе командасы 51:50 исәбе белән җиңү яулады. Яшүсмерләр командалары арасында Идел буе федераль округы чемпионатының финалына юллама һәм беренче урын өчен Яр Чаллы шәһәренең 50 нче урта мәктәбе һәм Кукмараның А.М.Булатова исемендәге күппрофильле лицей командалары очрашты. Һәм тамашачылар янә көч һәм тактик әзерлек буенча тигез көндәшләрнең уенын күрделәр. Әмма Кукмара командасының комбинацияләр арсеналы күбрәк булып чыкты. Уен 72:61 исәбе белән тәмамланды. Җиңүчеләрне Татарстан Республикасы Мәгариф һәм фән министрлыгының өстәмә белем бирү һәм балаларга тәрбия бирү бүлегенең әйдәп баручы киңәшчесе Лариса Габитова, район башлыгы урынбасары Петр Уразайкин, мәгариф идарәсе җитәкчесе Миләүшә Вәлиәхмәтова котладылар һәм бүләкләделәр.