Шәһәрдә район башлыгының хезмәт коллективлары белән очрашулары дәвам итә

Бүген район башлыгы Р.Г.Кәримов,«Челтәр компаниясе» АҖнең Зәй районы электр челтәрләре филиалы хезмәт коллективы белән очрашты. Разиф Галиевич энергетикларны узган елда шәһәрдә һәм районда башкарылган эшләр белән таныштырды, киләчәккә бурычлар билгеләде. Район башлыгы шулай ук коллективка авариясез хезмәтләре һәм районның социаль –икътисадый үсешенә керткән өлешләре, СВДда булган хәрбиләргә гуманитар ярдәм оештырганнары өчен рәхмәт белдерде. Оешманың 2025 елга эшчәнлек йомгаклары һәм 2026 елга перспектив планнары турында нотык белән аның башлыгы Лукин Олег Анатольевич чыгыш ясады. Оешма эшчәнлегенең төп юнәлешләре: кулланучыларны электр белән тәэмин итү, реконструкция, капиталь ремонт, техник хезмәт күрсәтү; хезмәт күрсәтүләрне гамәлгә ашыру; технологик тоташтыру. 2025 елда Зәй РЭС бүлү челтәрләре объектларын капиталь ремонтлау һәм реконструкцияләү эшләре кысаларында күп эшләр башкарылган: энергетика җиһазларын капиталь ремонтлау; техник хезмәт күрсәтү. "Тәгәрмәч заводы" һава линиясе реконструкцияләнде, 3,6 км озынлыкта ике чылбырлы линия төзелде, 1,2 км кабель алыштырылды. Сәвәләй, Александр Бистәсе, Югары Мәлем, Сармаш-Баш, Зәй-2, Кадер авылларында капиталь ремонт үткәрелде һ.б.лар. Очрашуда шулай ук «Челтәр компания» се АҖнең Кама филиалы директорының технологик тоташтыру буенча урынбасары Фәхретдинов Радик Рафаил улы, Татарстан Республикасы Дәүләт Советы депутаты — законлылык һәм хокук тәртибе комитеты рәисе урынбасары Фазылов Ринат Рафаэль улы катнаштылар һәм чыгыш ясадылар. Очрашу бүләкләү тантанасы белән тәмамланды. Район территориясендә гражданнар оборонасы буенча команда-штаб өйрәнүләре кысаларында гадәттән тыш хәлләрне кисәтү һәм бетерү эшенә керткән шәхси өлеше өчен, Зәй муниципаль районы башлыгының Мактау грамотасы белән Зәй районы электр челтәрләре башлыгы Лукин Олег Анатольевич бүләкләнде.