Аксар һәм Югары Шепкә авыл җирлекләрендә халык җыеннары узды

15 гыйнвар көнне Аксар һәм Югары Шепкә авыллары мәдәният йортларында район башлыгы урынбасары Петр Уразайкин һәм халык иминлеген тәэмин итү хезмәтләре вәкилләре катнашында халык җыеннары булып узды. Җыеннарда проблемалар тикшерелә, узган елда башкарылган эшләр турында мәгълүмат тыңлана һәм киләчәккә бурычлар билгеләнә. Очрашуда төп доклад белән Петр Уразайкин чыгыш ясады. Ул авыл кешеләрен районда 2025 елда башкарылган эшләр белән таныштырды, 2026 елга төп бурычларны билгеләде. Петр Сергеевич авыл халкына, туган районы хакына нәтиҗәле хезмәтләре, хәрбиләргә ярдәмнәре өчен рәхмәт белдерде, барысына да нык сәламәтлек һәм тыныч күк йөзе теләде. Аксар һәм Югары Шепкә авыл җирлекләре башлыклары Юрий Гыйльманов һәм Лилия Кәмәлиева үзләренең эшчәнлекләре турында халык алдында хисап тоттылар. Шулай ук авыл халкы өчен гамәлдәге дәүләт ярдәме программалары, авыл җирлекләрендәге оператив вәзгыять, Россельхозбанк тарафыннан авыл халкы өчен тәкъдим ителгән максатчан программалар турында нотыклар тыңланды. Очрашу азагында активистларны бүләкләү тантанасы булды. Бүген район башлыгы урынбасары катнашында Югары Пәнәче һәм Бигеш авыл җирлекләрендә халык җыеннары уза.