Зәйдә Россельхозцентр башлыгын лаеклы ялга озаттылар

Бүген Зәй муниципаль районы башлыгының Рәхмәт хатын тапшырып, З.Э. Тәхәветдинованы лаеклы ялга озаттылар. Зәлия Эльбрус кызы туган җирендә 40 ел хезмәт куеп, үзен республиканың авыл хуҗалыгын үстерүгә багышлады. Хезмәт эшчәнлеген Мөслим районында әйдәп баручы агроном булып башлый, 2001 елдан Зәй орлык инспекциясе башлыгы, 2007 елдан бүгенге көнгә кадәр Россельхозцентр ФДБУнең Татарстан Республикасы филиалында Зәй районы бүлеге башлыгы булып эшли. "Сезгә Авыл хуҗалыгы җитештерүендә күпьеллык намуслы хезмәтегез, Зәй муниципаль районының агросәнәгать комплексын үстерүгә керткән шәхси өлешегез өчен рәхмәт белдерәм. Ихлас күңелдән сезгә барлык изге ниятләрегезне тормышка ашыруда уңышлар, үзегезгә һәм якыннарыгызга нык сәламәтлек, бәхет телим. Киләчәктә дә сезгә иминлек һәм тотрыклылык юлдаш булсын!", - диелә район башлыгының Зәлия Тәхаветдиновага язган Рәхмәт хатында. Район башлыгы белән очрашуда «Россельхозцентр» ФДБУнең Татарстан Республикасы филиалыннан В. Л. Новичков - Зәлия Тәхәветдинованың турыдан-туры җитәкчесе дә катнашты. Виталий Леонидович шулай ук Зәлия Эльбрус кызына Рәхмәт хаты тапшырды, озак еллар намуслы хезмәте өчен рәхмәт белдерде, ныклы сәламәтлек, тынычлык һәм иминлек теләде.