Зәйдә район һәм шәһәр Советлары утырышлары узды

Бүген хакимият бинасының зур залында район башлыгы вазыйфаларын башкаручы П.С. Уразайкин рәислегендә Зәй муниципаль районы һәм шәһәре Советының бишенче утырышлары узды. Көн тәртибенә 11 сорау кертелгән иде. Депутатлар игътибарына Зәй муниципаль районы Советының һәм шәһәр Советының кайбер карарларына үзгәрешләр кертү, Зәй шәһәр прокуратурасының район Советының кайбер карарларына протест белдерүен карау, муниципаль милекне хосусыйлаштыруның фаразланган планы, милли мәдәниятләрне һәм традицияләрне саклау һәм аларга ярдәм итү, милләтара һәм конфессияара мөнәсәбәтләрнең торышы, райондагы миграцион вәзгыять буенча чыгышлар тәкъдим ителде. Шулай ук Зәй муниципаль районы Советының эш планы һәм Зәй шәһәре Советының 2026 елга эш планы мәсьәләләре каралды. Көн тәртибендәге барлык мәсьәләләр буенча депутатлар тиешле карарлар кабул итте. Нәтиҗәләр ясап, Петр Сергеевич утырышта катнашучыларга уртак эшчәнлекләре өчен рәхмәт белдерде, якынлашып килүче Яңа-2026 ел белән котлады, барысына да ныклы сәламәтлек, иминлек һәм тыныч күк йөзе теләде.