Зәй шәһәрендә спорт көрәше федерациясе призларына ирекле көрәш буенча турнир узды
"Старт" спорт-сәламәтләндерү комплексы базасында Зәй шәһәренең спорт көрәше федерациясе призларына егетләр һәм кызлар арасында ирекле көрәш буенча ачык турнир узды. Чара Россия Федерациясе территориясендә физик культураны һәм спортны популярлаштыруга, спорт инфраструктурасын үстерүгә һәм спорт талантларына ярдәм итүгә юнәлдерелгән «Россия спорты» дәүләт программасын гамәлгә ашыру кысаларында уздырылды. Мавыктыргыч бәйгеләрдә 12 командадан 155 яшь спортчы катнашты. Тантаналы чарада район башлыгы урынбасары Петр Уразайкин, район Башкарма комитеты җитәкчесе урынбасары Регина Камалова, Зәй шәһәренең спорт көрәше федерациясе рәисе Николай Тихонов, "Зәй" спорт мәктәбе директоры Рамил Фаршатов, тренер-укытучылар, шулай ук турнирның иганәчеләре катнашты. Катнашучыларга һәм тамашачыларга сәламләү сүзе белән район башлыгы урынбасары Петр Уразайкин мөрәҗәгать итте. Ул барысын да спорт көрәше федерациясе призларына ирекле көрәш буенча беренче турнир ачылу белән котлады, ирекле көрәшнең спортның өстенлекле төрләренең берсе булуын ассызыклады. Петр Сергеевич шәһәрдә көрәшкә нигез салучы И.К. Имамиевның әлеге спорт төрен үстерүгә керткән зур өлешен билгеләп үтте. Ул шулай ук югары нәтиҗәләргә ирешкән күренекле спортчыларны телгә алды: СССРның спорт мастеры Исхаков Ф.Ф., РСФСРның спорт мастеры Васильев М.П., Россиянең спорт мастеры Терентьев А. А. һәм ирекле көрәш буенча спорт мастеры Латыйпов И. А. "Зәй" спорт мәктәбенең талантлы тренер-укытучылары Хәйруллин И.Г., Салихов Р.Р. һәм Кәлимуллин Л. М. да аеруча билгеләп үтелде. Петр Уразайкин рәхмәт сүзләрен җиткереп, спорт көрәше рәисе Николай Тихоновка район башлыгының Рәхмәт хатын тапшырды, шәхси эшмәкәр, спорт мастеры, Бөтенсоюз ярышларында җиңүче Марсил Миңнехановка Зәй шәһәре спорт көрәше федерациясенең Рәхмәт хатын тапшырды. Ярышлар йомгаклары буенча 9 Зәй спортчысы җиңүче булды, 8 - көмеш, 9 - бронза медальгә лаек булды. Бу турнир хакимият органнарының, спорт федерацияләренең, тренерларның, спортчыларның һәм меценатларның уртак тырышлыгы массакүләм спортны үстерү һәм үсеп килүче буынны тәрбияләү өлкәсендә куелган максатларга ирешүгә ярдәм итүенең ачык мисалы булды.