Дуслык белән көчле без

Зәйдә 27 милләт вәкиле яши. Төрле милләт вәкилләре арасында үзара тыныч-тату мөнәсәбәт булдыра алу, аңлашып яшәүгә ирешү, иҗтимагый-сәяси тотрыклылыкны тәэмин итү – Зәебезнең зур казанышы. Гомумән, халыклар дуслыгын ныгыту, бер-берсенә хөрмәтле итеп тәрбияләү – көн кадагындагы мәсьәлә.
“Энергетик” Мәдәният сарае җитәкчелеге ветераннар өчен Шәфкатьлелек елы уңаеннан “Шәһәрләр туганлыгы” интернациональ ял кичәсе оештырды. Кичә ветераннарның “Күңелебез һаман яшь” V фестивале буларак узды. Аңа “Сәвәләй” керәшен, “Русская душа” рус фольклор ансамбльләре, “Зәй тавышы” ветераннар хоры, Чаллы шәһәреннән “Дивоцвит” казаклар ансамбле чакырылды. Сәхнәгә бер-бер артлы күтәрелгән керәшен, рус, казак ансамбльләре, “Энергетик” сарае үзешчәннәре чыгышларында дуслык-татулык, бербөтен булып аңлашып яшәү кирәклеге кызыл җеп булып сузылып барды. Кыскасы, чыгышларда телләр төрле булса да, теләкләр бер. Араларында “Русская душа”, “Сәвәләй” ансамбльләре – иң өлкәне. Иң яше – “Зәй тавышы” хоры. Бу коллектив репертуарында әлегә рус җырлары гына, алга таба татар җырларын да башкарырга исәп, ди Румия Забирова. Украин, рус җырларын башкаручы “Дивоцвит” казак ансамбле 2008 елда оешкан. Әлеге ансамбльгә төрле милләт вәкилләре тартылган. Ансамбль репертуарын башка милләт җырлары белән дә баетырга исәпли.