Зәй халкы хәрби комиссар А. Ф. Әгъләмҗанов белән хушлашты
Бүген Зәй районы халкы хәрби комиссар Айрат Фоат улы Әгъләмҗанов белән хушлашты. Хушлашу чарасы «Энергетик» мәдәният йортында узды. Монда мәрхүмнең хезмәттәшләре, туганнары, якыннары, республика һәм район җитәкчеләре, Айрат Фоат улын чын офицер, үз сүзенә һәм бурычына тугры булган якты кеше буларак белгән кешеләр җыелган иде. Айрат Әгъләмҗанов бөтен гомерен Ватанга хезмәт итүгә багышлаган. Хәрби хезмәтен Пермь хәрби авиация училищесында укудан башлый. Укуын тәмамлагач, 1994-2010 елларда контракт буенча хезмәт итә. 2010 елның апреленнән Зәй шәһәре һәм Зәй районы хәрби комиссариатында эшли. Айрат Фоат улының һөнәри юлы үз эшенә тугрылык үрнәге булды. Ул хәрби хезмәткә чакырылучылар белән шәхсән очрашты, хәрбиләрнең тантаналы ант кабул итүендә катнашты. Подполковник махсус хәрби операция зонасында хәрби бурычын үтәгәндә һәлак булган һәр якташыбызны каршы алды. Һәр гаиләдә булды, үз йөрәге белән туганнары белән югалту ачысын уртаклашты, һәр геройны соңгы юлга озатуда катнашты. Бүген зәйлеләр тулы зал белән хәрби комиссарның үзен соңгы юлга озаттылар.
"Хөрмәтле Гөлшат Нәкыйп кызы, Динә Айрат кызы, Азат Айрат улы, Айрат Фоат улының туганнары һәм якыннары! Зәй районы зур югалту кичерә. Без чын офицерны, антка тугры булган, яхшы дустыбызны һәм көрәштәшебезне югалттык. Айрат Фоат улы хәрби хезмәтнең барлык баскычларын үткән кеше буларак, һәрвакыт намус белән эшләде, үзенә йөкләнгән бурычларны зур җаваплылык белән һәм лаеклы башкарды. Барлык зәйлеләр исеменнән авыр югалту сәбәпле кайгы уртаклашу сүзләрен кабул итегез. Бу авыр минутларда сезгә сабырлык һәм ныклык телим. Айрат Фоат улы истәлеге зәйлеләр күңелендә мәңге яшәр", - диде үз чыгышында район башлыгы Разиф Кәримов.
Шулай ук гаиләләренә, туганнарына һәм якыннарына кайгы уртаклашу сүзләрен Татарстан Республикасы Дәүләт Советы депутаты Р.Р. Фазылов, Татарстан Республикасы хәрби комиссары урынбасары Э. И. Тимербулатов, Чаллы шәһәренең Үзәк һәм Автозавод районнары хәрби комиссары Р. Ф. Ильясов, хәрби комиссариатның өлкән белгеч – эксперты Г. М. Борисов, ветераннарның җирле иҗтимагый оешмасы рәисе А. В. Алексеев җиткерде.
Айрат Фоат улы Әгъләмҗановны соңгы юлга бөтен хәрби тәртипләрне үтәп озаттылар. Зәйлеләр бер минут тынлык белән һәм чәчәкләр салып хәрби комиссар истәлегенә хөрмәт күрсәттеләр. Айрат Әгъләмҗановны Кукмара районының Кәркәүч авылы зиратына җирләделәр.