Зәйдә беренче көзге авыл хуҗалыгы ярминкәсе узды

Бүген «Энергетик» мәдәният сарае каршындагы мәйданда беренче көзге авыл хуҗалыгы ярминкәсе узды. Иртә таңнан Зәй һәм күрше районнарның авыл хуҗалыгы товар җитештерүчеләреннән, авыл җирлекләрендә яшәүчеләрдән ит һәм сөт продукциясе, яшелчә, бал һәм башка продукция сатып алу өчен күп кенә зәйлеләр сәүдә рәтләре янына җыелдылар. Бу көзнең беренче ярминкәсендә тәкъдим ителгән товарларның ассортиментын район башлыгы Р.Г. Кәримов бәяләде. Разиф Гали улы беренчеләрдән булып сәүдә рәтләрен йөреп чыкты, зәйлеләрне беренче ярминкә белән котлады, оештыручыларга бердәм эшләре өчен рәхмәт белдерде. Район территориясендә атналык авыл хуҗалыгы ярминкәләрен үткәрүдә актив катнашканнары өчен кулланучылар хокукларын яклау һәм кеше иминлеге өлкәсендә күзәтчелек федераль хезмәтенең Татарстан Республикасы буенча идарәсенең Түбән Кама районында һәм шәһәрендә, Зәй районында территориаль бүлеге башлыгы урынбасары Насыйбуллин Ринат Миңнулла улы, "Благострой" ширкәте директоры Максим Сабанов, "Горзеленхоз" ширкәте директоры Фәнзур Хәсәншин район Башлыгының Рәхмәт хаты белән бүләкләнделәр. "Энергетик" мәдәният йорты иҗат коллективлары ярминкә кунакларын үзләренең дәртле җырлары һәм биюләре белән сөендерделәр, авыл җирлекләре кайнар чәй һәм коймак белән сыйладылар. Беренче ярминкәдә барлыгы 1 млн 17 мең сумлык 9 тоннадан артык продукция сатылган.