Район башлыгы «Зәй шикәре» АҖнең шикәр кайнату сезонына әзерлек барышы белән танышты

Район башлыгы Разиф Гали улы Кәримов 31 июльдә эш визиты белән «Зәй шикәре»АҖендә булды. Ул «Агрокөчләр» АҖ генераль директорының шикәр заводы эшчәнлеге мәсьәләләре буенча урынбасары Александр Цветков белән бергә район Башкарма комитеты җитәкчесенең икътисадый үсеш, сәнәгать, сәүдә һәм эшкуарлыкка ярдәм буенча урынбасары Марат Хәбибуллин, авыл хуҗалыгы һәм азык-төлек идарәсе башлыгы Фәргать Камалиев белән берлектә заводның шикәр эшкәртү сезонына әзерлеге белән танышты. Шикәр заводы шикәр кайнату сезоны башлануга әзерлек стадиясендә. Завод чөгендерне 23 августтан кабул итә башлый. Берничә көннән белгечләр уңышны эшкәртергә керешәчәк. Барлыгы республиканың биш муниципаль районыннан татлы тамыр җибәрү планлаштырыла. Безнең районда фирма культурасы 9,5 мең гектардан артык мәйданда үстерелгән.