Зәй районында хәрби Шатунов Игорь Михайловичны соңгы юлга озаттылар

Бүген зәйлеләр махсус хәрби операциядә катнашканда һәлак булган хәрби хезмәткәрне - рядовой Шатунов Игорь Михайловичны соңгы юлга озаттылар. Матәм панихидасы «Энергетик»мәдәният йортында узды. Район башлыгы Разиф Кәримов һәлак булучының туганнарына, якыннарына, барлык зәйлеләргә кайгы уртаклашу сүзләре белән мөрәҗәгать итте. "Геройларыбызга рәхмәтне сүзләр белән генә тапшырып бетереп булмый. Алар, оборонаның беренче сызыгында булып, батырлык артыннан батырлык күрсәтәләр, илебезнең бәйсезлеген һәм кыйммәтләребезне яклыйлар, сугышка ни өчен баруларын аңлыйлар, әмма шуңа да карамастан, рухларының бөеклеге аларга намус һәм бурыч юлыннан чигенергә мөмкинлек бирмәде", - диде Разиф Галиевич. Татарстан Республикасы Хөкүмәте кураторы И.Н.Гущин да Татарстан Республикасы Рәисе Р.Н. Миңнеханов исеменнән хәрбинең туганнарының кайгысын уртаклашты. Шулай ук кайгы уртаклашу сүзләре белән Зәй шәһәре һәм Зәй районы хәрби комиссары А.Ф. Әгъләмҗанов һәм «Елховнефть» нефть - газ чыгару идарәсе вәкиле Д. В. Луконин чыгыш ясады, хәрби бу оешмада 25 еллап хезмәт куйган. Солдатны бер минут тынлык белән искә алдылар. Игорь Михайловичны соңгы юлга барлык хәрби хөрмәтләр белән озаттылар. Хәрби хезмәткәрне Яңа шәһәр микрорайоны зиратына җирлиләр. Ватанны саклаучының истәлеге зәйлеләр күңелендә мәңге яшәр.