Зәйдә Сөббух Рәфыйков исемендәге премия тапшырылды
25 июль көнне Үзәк китапханәдә Сөббух Рәфыйков исемендәге премия тапшырылды. Премия милли мәдәниятне, әдәбиятны, сәнгатьне үстерүгә зур өлеш керткән, һөнәри осталыгы, үз авторлык стиле булган, җәмгыять тарафыннан танылган аерым шәхесләргә һәм коллективларга бирелә. Быел конкурс комиссиясе карары белән, Зәй балалар музыка мәктәбе лауреат булды. Зәй балалар музыка мәктәбе-балаларга өстәмә белем бирү учреждениесе, ул укыту һәм иҗат өчен киң мөмкинлекләр бирә: инструменталь башкару, ялгыз һәм хор җырлау. Бу аерым бер төр шәхес формалаштыручы, һәр укучыга үз талантын ачу, артистлык һәм иҗади фикерләүне үстерү мөмкинлеге бирелә торган киңлек. Нигез салынганнан бирле аны 1000нән артык кеше тәмамлаган, аларның күбесе музыканы үз һөнәре итеп сайлаган. Дистәләгән укучылар балалар иҗаты йортларында, мәдәният сарайларында музыка җитәкчеләре, мәктәпләрдә һәм балалар бакчаларында музыка укытучылары булып эшлиләр.
Район башлыгы Разиф Гали улы Кәримов музыка мәктәбе коллективына Лауреат дипломын тапшырды. Бу көнне залда узган еллардан бирле Сөббух Рафыйков премиясе лауреатлары булган шәхесләр, шулай ук Сөббух Рафыйковның оныгы Айнур да бар иде. Чарага чакырылучылар премия иясе адресына җылы теләкләре белән уртаклаштылар. Музыкаль номерлар тантанага тагын да ямь өстәде.