Зәйдә "Герой атасы" республика күргәзмәсе эшли башлады

Бүген "Энергетик" мәдәният сараенда "Герой атасы" бөтенроссия проекты кысаларында республика күргәзмәсе эшли башлады. "Герой атасы" күчмә күргәзмәсе яшь буынны Ватанны саклап калган геройларга һәм аларның ата-аналарына хөрмәт рухында тәрбияләүгә юнәлдерелгән. Күргәзмәне ачуда район башлыгы урынбасары Петр Уразайкин һәм район оешмалары җитәкчеләре катнашты. "Әлеге экспозиция илне саклаганда һәлак булган махсус хәрби операциядә катнашучыларның әтиләренең портретларын берләштерә. Бу проект Ватанга мәхәббәтнең дәвамчанлыгын гәүдәләндерә. Безнең якты киләчәгебез өчен башларын салган геройлар онытылырга тиеш түгел. Аларның исемнәре безнең йөрәкләрдә мәңгегә сакланачак", - дип билгеләп үтте үзенең чыгышында Петр Сергеевич. "Үз вакытында аталар Ватан алдындагы бурычларын үтәделәр, һәм алар үрнәгендә уллары, туган илгә чакырудан читтә калмыйча, илебезне якларга киттеләр. Җиңү җиңел бирелми, аның өчен улларыгыз үз гомерләре белән түләгән. Шундый уллар үстергәнегез өчен рәхмәт сезгә», - дип мөрәҗәгать итте батыр улларның әти-әниләренә район ветераннар советы рәисе Алексей Алексеев.