Зәйдә Татьяна Васильевна Воропаева белән хушлаштылар
Бүген Зәй шәһәренең «Энергетик» мәдәният йортында Зәй муниципаль районы башлыгы, бишенче чакырылыш Татарстан Республикасы Дәүләт Советы депутаты, «Яз» Татарстан төбәк иҗтимагый хәйрия оешмасы советы рәисе булып эшләгән Воропаева Татьяна Васильевна белән хушлашу булды. Хушлашуда Зәй муниципаль районы башлыгы Разиф Кәримов, Татарстан Республикасы Дәүләт Советы депутатлары, Татарстан Республикасы Рәисе Администрациясе җитәкчесенең беренче урынбасары – Татарстан Республикасы Рәисе Территорияләр белән эшләү идарәсе башлыгы Гарипов Илнур Мәхмүт улы, «Татарстан Республикасы Муниципаль берәмлекләре Советы» Ассоциациясе рәисе киңәшчесе Дәүләтшин Фердинат Мидхәт улы, «СМП-Нефтегаз» АҖ генераль директоры киңәшчесе - Комаров Фоат Фәһим улы, аның якыннары, дуслары, хезмәттәшләре һәм район халкы катнашты.
Матәм чарасында Татьяна Васильевна гаиләсе һәм якыннарының кайгысын беренчеләрдән булып район башлыгы Разиф Гали улы Кәримов уртаклашты:
"Татьяна Васильевна үз хезмәт юлын районыбызга хезмәт итүгә багышлады. Аның һөнәри юлы үз эшенә тугрылык үрнәге булды. Татьяна Васильевна актив тормыш позициясе булган абруйлы җитәкче иде, Зәй районының инфраструктурасын, икътисадын, социаль өлкәсен үстерүгә зур өлеш кертте. Ул халык файдасына эшләүче күп кенә мөһим проектларның башлап йөрүчесе булды.2014 елда Воропаева Татьяна Васильевнага «Зәй муниципаль районының Мактаулы гражданины» исеме бирелде. Якын кешенең үлеме - ул һәрвакыт зур югалту. Барлык зәйлеләр исеменнән ихлас күңелдән әйтелгән кайгы уртаклашу сүзләрен кабул итегез".
Кайгы уртаклашу сүзләре белән шулай ук Татарстан Республикасы Рәисе Администрациясе җитәкчесенең беренче урынбасары – Татарстан Республикасы Рәисенең территорияләр белән эшләү идарәсе башлыгы Гарипов Илнур Мәхмүт улы, Татарстан Республикасы Дәүләт Советы депутатлары: Захарова Светлана Михайловна, Әминов Илшат Юныс улы, Комаров Рияз Фоат улы, Нугаев Камил Әсгать улы, Зәй политехника көллияте директоры Исрафилова Вәсилә Кәрим кызы чыгыш ясадылар.
Татьяна Воропаева 14 июльдә 72 яшендә вафат булды, аны Зәйнең Яңа шәһәр микрорайоны зиратына җирләделәр.
Татьяна Васильевна Воропаеваның якты истәлеге зәйлеләр йөрәгендә озак сакланыр!