Зәй игенчеләре бөртекле культураларны җыюга кереште

Бүген урып-җыюга беренчеләрдән булып «Зәй шикәре» агрофирмасының «Сәвәләй» җитештерү комплексы комбайнчылары кереште. Иртән көзге бодай кырына җиде комбайн чыкты. Урып-җыюга чыккан беренче комбайнчылар арасында «чәчү батыры» исеменә ия Илгиз Биккинин да бар иде. Ул инде 18 ел механизатор булып эшли, шуның ун елы – комбайн штурвалында үтте. Илгиз Биккинин белән бергә уракка ата-уллы Гыйльметдин һәм Нияз Фәйрушиннар, Шәйхенур Миңнекаев, Валерий Бутяев, Фәнил Закиров, Сергей Краснов керештеләр. «Зәй шикәре» агрофирмасының баш агрономы Айдар Тучин хәбәр иткәнчә, алар 4419 га көзге бодай һәм 4238 га сабан бодаен җыеп алырга тиеш. Якын арада яңгырлар көтелми, шуңа күрә уңышны тиз арада җыеп алу күздә тотыла. "Бүген без бөртекле культураларны җыюга керештек, көзге бодайның иртә өлгергән «Базальт-2"сортын җыюдан башладык. Районда барысы 16 572 га көзге бодай һәм 11 735 га сабан бодае җыеп аласы бар. Уңыш яхшы булырга вәгъдә итә. Комбайнчылар бар көчләрен куеп эшкә керештеләр, аларга лаеклы хезмәт хакы түләнәчәк", - дип билгеләп үтте Зәй районы авыл хуҗалыгы идарәсе башлыгы Фәргать Камалиев.