Район башлыгы Р.Г. Кәримовның 8 март - Халыкара хатын-кызлар көне белән котлавы

Хөрмәтле зәйлеләр! Кадерле хатын-кызларыбыз, әниләр, әбиләр, сеңелләр! Сезне чын күңелдән 8 Март – Халыкара хатын-кызлар көне белән тәбрик итәм. Яз башы табигать уянуы белән яңа планнар һәм хыяллар тууына сәбәп була, шатлык һәм өмет бүләк итә. Мондый күтәренке кәеф сезне һәрдаим озата барсын, көч һәм ышаныч бирсен. Күп тармакларда нәкъ менә гүзәл затлар хезмәт коллективларының нигезен тәшкил итә. Сез муниципаль районыбыз үсешенә зур өлеш кертәсез, шул ук вакытта сөйкемле, сабыр һәм зирәк, кайгыртучан әниләр, яратучан хатыннар, гаилә учагы җылысын саклаучылар булып каласыз. Эш урынында һәм өйдә барлык эшләрне бергә алып бару осталыгыгыз, гаиләне бербөтен итеп тотуыгыз, яңа максатларга илһамландыруыгыз, һәрчак ярдәм итәргә әзер булуыгыз, җылылыгыгыз, мәхәббәтегез белән берләштереп торуыгыз өчен чын күңелдән рәхмәт сүзләрен кабул итегез. Махсус хәрби операциядә катнашучыларның әниләренә улларын Ватаныбызны чын саклаучылар итеп тәрбияләгәннәре өчен зур рәхмәтлебез. Хатыннарга, кызларга, апаларга бөтен ил өчен шундый мөһим вакытта аңлаулары һәм ярдәм итүләре өчен рәхмәт. Фронттагыларга ярдәм итүче – җылы оекбашлар бәйләүче, маскировка челтәрләре үрүче, коры ризыклар әзерләүче, кием тегүче хатын-кыз волонтерларга зур рәхмәтемне белдерәм. Бөек Ватан сугышы елларында ир-атлар белән беррәттән Ватанны каһарманнарча саклаган, тылда хезмәт иткән, ә бүген яшь буынга үрнәк булып торучы ветеран хатын-кызларга аерым котлау һәм рәхмәт сүзләрен җиткерәм. Хезмәт сөючәнлегегез, күңел җылыгыз, дөньяны яктырак һәм игелеклерәк итә белүегез өчен рәхмәт сезгә, кадерле хатын-кызларыбыз! Барыгызга да ныклы сәламәтлек, иминлек, уңышлар һәм тыныч күк йөзе телим. Сезнең һәрберегезне якыннарыгызның кайгыртуы, мәхәббәте урап йөртсен. Разиф Кәримов, муниципаль район башлыгы