Туган телем-иркә гөлем

Үз илеңә булган чын мәхәббәтне үз телеңә булган мәхәббәттән башка күз алдына да китереп булмый. Һәр кеше балачактан ук туган телендә сөйләшә, уйлый, фикер йөртә башлый. Үз телеңне белү һәм башкаларга хөрмәт кешене акыллырак, игелеклерәк, мәдәниятлерәк итә. 21 февраль - Халыкара туган тел көне. Бәйрәм юкка чыга торган телләрне саклау һәм үстерү, шулай ук тел һәм мәдәни традицияләр турында белемнәрне арттыру максатында билгеләп үтелә. Бу көнгә районның барлык мәктәпләрендә дә чаралар циклы узды. Шуларның берсе «Туган тел, син нинди матур!" гомумшәһәр чарасы булды. Ул 2 нче мәктәп базасында узды. Тел-халыкның иң зур байлыгы. Күп кенә язучылар, шагыйрьләр тел үсешенә зур өлеш керттеләр. Актлар залы сәхнәсендә Ф.Яруллин, Х. Халиков, Й. Шәрәпова, Р.Вәлиева, Х. Туфан, Ш. Маннур, Ватанны саклаучылар елы һәм Бөек Җиңүнең 80 еллыгы кысаларында герой-шагыйрь Муса Җәлилнең ялкынлы шигырьләре яңгырады. Вокаль номерлар, бию композицияләре һәм милли биюләр барлык кунакларга бик күп күңелле һәм уңай хис-кичерешләр бүләк итте. Туган тел көне тәмам, әмма үткәрелгән чараның дулкынландыргыч минутлары укучылар хәтерендә бик озак сакланыр әле. Россиянең күпмилләтле дәүләт, безнең уртак йортыбыз булуын балалар тагын бер кат расладылар. Барлык милләт вәкилләре дус-тату яшәгәндә генә илебез тыныч, күгебез аяз булыр.