Зәйдә каты авырулы гражданнарга шәфкать туташы хезмәтләре күрсәтелә

«Демография» милли проектының «Өлкән буын» проекты кысаларында Татарстанда өлкән яшьтәге гражданнарны һәм инвалидларны озак вакытлы карау системасы гамәлгә ашырыла. Ул шул исәптән стационарны алмаштыра торган технологияләр кертүне дә күздә тота, шулардан берсе-каты авырулы өлкән яшьтәге гражданнарга һәм инвалидларга шәфкать туташы хезмәтләрен күрсәтү. Зәйдә ел ахырына кадәр 10 кешегә хезмәт күрсәтеләчәк. Озак вакыт карау кысаларында шәфкать туташы хезмәте (атнага 28 сәгать) бушлай күрсәтелә. Караучы хезмәтләренә мохтаҗлык Татарстан Республикасы Хезмәт, халыкны эш белән тәэмин итү һәм социаль яклау министрлыгы тарафыннан расланган форма буенча чит ярдәмгә бәйлелекне бәяләү бланкы нәтиҗәләреннән чыгып билгеләнә. Бәяләүне үткәргәндә исәп – хисапка күп факторлар алына-бу яшәү шартлары да, уңайлыклар да, карарга сәләтле һәм карарга теләүче туганнарның булуы да. Шуннан соң өлкән яшьтәге гражданинга (инвалидка) «Караучы» хезмәте күрсәтү турында карар кабул ителә һәм социаль хезмәт алуның индивидуаль программасы төзелә, аның нигезендә өлкән яшьтәге кешегә кирәкле хезмәтләр күрсәтелә. Әлеге хезмәтләрне Яр Чаллы шәһәреннән «Ярдәм үзәге» АНО хезмәткәрләре күрсәтә. Эш «Радость» халыкка комплекслы социаль хезмәт күрсәтү үзәге белән тыгыз хезмәттәшлектә алып барыла, алар хезмәткә мохтаҗ өлкән яшьтәге гражданнарны да, шәфкать туташларын да сайлап алуда катнашалар. Өйдә социаль хезмәт күрсәтү бүлеге белгечләре, күрсәтелә торган хезмәтләрнең сыйфатын контрольдә тоту өчен, айга кимендә бер тапкыр өлкән яшьтәге ун кешенең һәрберсенә барачак. Шәфкать туташы хезмәте, беренче чиратта, үз-үзенә хезмәт күрсәтү сәләтен тулысынча югалткан ялгыз өлкән кешеләргә һәм инвалидларга кирәк булганлыктан, «шәфкать туташы» стационарын алмаштыручы технологияне кертү өлкән кешегә кирәкле хезмәтләрне гадәти, өй мохитендә алырга мөмкинлек бирәчәк.