Зәйдә Россия Эчке эшләр органнары хезмәткәрләре көнен билгеләп үттеләр

Бүген Зәйдә Россия Эчке эшләр органнары хезмәткәрләре көненә һәм Россия полициясе оешуга 306 ел тулуга багышланган тантаналы чара узды. Чарада район башлыгы Разиф Кәримов, Россия Эчке эшләр министрлыгының Зәй районы буенча бүлеге җитәкчесе Марат Дәүләтшин, ведомство хезмәткәрләре һәм ветераннары катнашты. Чарада катнашучыларны һөнәри бәйрәмнәре белән котлап, Разиф Галиевич: «Ел саен 10 ноябрьдә Россиядә Эчке эшләр органнары хезмәткәрләренең һөнәри бәйрәме билгеләп үтелә. Россия Эчке эшләр министрлыгының Зәй районы буенча бүлегендә һөнәри осталар һәм үз эшенең патриотлары эшли. 2024 елның 10 ае нәтиҗәләре буенча Зәй бүлеге республика буенча 1 урынны алды. Эчке эшләр органнары хезмәткәрләренең эше һәрвакыт намус, батырлык һәм югары фидакарьлек символы булды һәм шулай булып кала да. Шәһәребез һәм районыбыз урамнарында тәртип, гражданнарның тынычлыгы, аларның үз иминлекләренә ышанычы нәкъ менә күбесенчә сездән тора"-дип ассызыклады үзенең котлау чыгышында. Аннары бүләкләү тантанасы булды. Район башлыгының Мактау грамотасы белән полиция подполковнигы, полиция башлыгының оператив эш буенча урынбасары Эдуард Ефимов һәм эчке хезмәт подполковнигы, тыл башлыгы Рушат Шәйхиев бүләкләнде. Район башлыгының Рәхмәт хаты белән полиция подполковнигы, полиция башлыгы урынбасары (җәмәгать тәртибен саклау буенча) Илмир Хәйретдинов, полиция лейтенанты, шәхси состав белән эшләү бүлеге белгече Полина Колбешина, отставкадагы милиция майоры Лидия Әхмәтова бүләкләнде. Үз коллективын шулай ук Зәй эчке эшләр бүлеге башлыгы Марат Дәүләтшин котлады,ул иң яхшы хезмәткәрләрне бүләкләде, хезмәттәшләренә ныклы сәламәтлек, күңел күтәренкелеге һәм гаилә иминлеге теләде. Рәхмәт сүзләре шулай ук Эчке эшләр министрлыгы ветераннарына юлланды, алар хәзер дә яшь хезмәткәрләрне тәрбияләүгә һәм һөнәри үстерүгә зур өлеш кертәләр, хезмәтнең бай тәҗрибәсен һәм иң яхшы традицияләрен тапшыралар.