Зәйдә хәрбиләрне соңгы юлга озаттылар

Бүген зәйлеләр махсус хәрби операциядә катнашучылар-рядовойлар Вәлиуллин Ринат Фәиз улы һәм Галиуллин Ринат Рәшид улы белән хушлашты. Матәм чарасы «Энергетик» мәдәният йортында узды. Район башлыгы Разиф Кәримов хәрбиләрнең туганнары, якыннары, барлык зәйлеләрнең кайгысын уртаклашты. "Хөрмәтле әти-әниләр, туганнар һәм якыннар! Уртак кайгы - хәсрәтебезне тулысынча чагылдырырлык сүзләр юк. Россия Федерациясе Президенты Владимир Владимирович Путин, Татарстан Республикасы Рәисе Рөстәм Нургали улы Миңнеханов, шәхсән үзем һәм барлык зәйлеләр исеменнән кайгыгызны уртаклашам! Бөтен район халкы, барлык зәйлеләр сезнең белән бергә кайгыра. Без Ринат Фәиз улы һәм Ринат Рәшид улы белән горурланабыз һәм алар турында истәлекне йөрәкләребездә озак сакларбыз. Ватанны саклаучыларга мәңгелек дан!". Чарада катнашучылар алдында шулай ук ТР Хөкүмәтеннән куратор Иван Гущин, Зәй шәһәре һәм Зәй районы хәрби комиссары Айрат Әгъләмҗанов чыгыш ясады. Хәрбиләрне соңгы юлга барлык тәртипләрне үтәп озаттылар. Солдатларны бер минут тынлык белән искә алдылар. Геройлар истәлеге зәйлеләр күңелендә озак яшәр!