Район башлыгы машина төзүчеләрне һөнәри бәйрәмнәре белән котлады
Бүген район башлыгы Разиф Кәримов «Аккурайд Уилз Руссиа» ҖЧҖ предприятиесендә булды һәм заводның хезмәт коллективы белән очрашты. Разиф Гали улы коллективны 2023 елда һәм 2024 елда районның социаль-икътисади үсеше нәтиҗәләре, киләчәккә перспективалар белән таныштырды. Район башлыгы шулай ук машина төзүчеләрне һөнәри бәйрәмнәре белән котлады, бердәм хезмәтләре өчен рәхмәт белдерде һәм коллективка предприятие үсешендә уңышлар теләде. Башкарма директор Кирилл Катышев кыскача гына «Аккурайд Уилз Руссиа» ҖЧҖнең узган елгы һәм 2024 елның агымдагы чорындагы эшчәнлеге турында сөйләде, заводның хуҗалык - көнкүреш бурычларын хәл итүдә ярдәм иткәне өчен район башлыгына рәхмәт белдерде. Хезмәт коллективы белән очрашудан соң, район башлыгы җитештерү объектларында булды һәм предприятиенең төп эшчәнлеге-йөк һәм җиңел автомобильләр өчен штампланган тәгәрмәчләр җитештерү барышын карады. Шулай ук район башлыгына яңа җиһаз – киң кулланылышлы әйләнмәле станок күрсәтелде, аны файдалануга тапшыру җитештерүчәнлекне сизелерлек арттырачак, шуның белән бөтен AWEA төркеме буенча нәтиҗәлелек күрсәткечләрен арттырачак. Разиф Гали улы коллективны яңа җиһаз алулары белән котлады һәм үсешкә юнәлтелгән инвестицияләр өчен рәхмәт белдерде.