Зәйдә «әтиләр көне» спорт эстафетасының муниципаль этабы узды

14 сентябрьдә «Энергия» стадионында якынлашып килүче Россиядә әтиләр көненә һәм Гаилә елына багышланган муниципаль ярышлар узды. Ярышлар «Демография» милли проектының «Спорт – тормыш нормасы» федераль проекты максатларына туры китереп уздырылды. Ярышларда катнашучыларны Зәй районы башкарма комитеты җитәкчесенең социаль мәсьәләләр буенча урынбасары Светлана Ревина сәламләде. Ул билгеләп үткәнчә, җиңүчеләр республика ярышларында район данын якларга барачак. - Әтиләр һәм уллар – сез безнең яклаучыларыбыз. Гаиләгезнең көче генә түгел, Ватаныбызның көче дә сездән тора. Призлы урыннар да алай ук мөһим түгел – гаиләдә һәм илебездә бердәмлек мөһимрәк урын алып тора, - дип мөрәҗәгать итте командаларга Зәй районы ветераннар Советы рәисе Алексей Алексеев. Шунысын да билгеләп үтәргә кирәк, ярышларга үз уллары белән махсус хәрби операциядә катнашучы ике кеше дә килгән иде. 7 яшьтән 12 яшькә кадәрге әтиләр һәм уллар командалары өчен күңелле сынаулар әзерләнде. Катнашучыларга турнирда мөмкин кадәр күбрәк көч җыярга, баскетбол тупын боҗрага ыргытырга, бергәләп озын чапкыч аша сикерергә, барысыннан да тизрәк таяк һәм кыршаулар тотып йөгерергә, теннис тупларын конусларга эләктерергә кирәк иде. Сынауларны җиңү өчен әтиләргә һәм улларга көч, тизлек, җитезлек күрсәтү генә түгел, бәлки бердәмлек, үзара ярдәмләшү дә кирәк булды. Шунысы сөендерә, үз ирләре өчен "җан атарга" хатыннары, әниләре һәм апалары килгән иде. Гаилә ул кеше тормышында иң мөһиме. Ә һәр кеше нәрсә тели?Һәркемнең гаиләсендә барысы да бәхетле һәм сәламәт булсын иде. Халыкта сәламәт тәндә — сәламәт рух дип юкка гына әйтмиләр. Спорт белән шөгыльләнү кеше сәламәтлегенә уңай йогынты ясый. Шуңа күрә кеше тормышында аның роле зур әһәмияткә ия. Спорт бәйрәмендә әтиләр һәм уллар спортта үз осталыкларын күрсәттеләр һәм барлык эстафеталар йомгаклары буенча урыннар түбәндәгечә бүленде: 1 урын - Ревиналар Алексей һәм Егор (13 очко); 2 урын - Сәмигуллиннар Айрат һәм Артур (21 очко); 3 урын - Савгильдиннар Максим һәм Димид (22 очко);