Зәйдә хәрби хезмәткәр И.И. Сираҗетдиновны соңгы юлга озаттылар

Бүген Зәй районы махсус хәрби операциядә катнашкан кече сержант Сираҗетдинов Илдар Илдус улы белән хушлашты. Хәрби хезмәткәр хәрби бурычын үтәү барышында һәлак булган. Матәм панихидасы «Энергетик» мәдәният йортында узды. Район башлыгы вазыйфаларын башкаручы Петр Уразайкин мәрхүмнең апасына, туганнарына, якыннарына, барлык зәйлеләргә кайгы уртаклашу сүзләре белән мөрәҗәгать итте. Җыелучылар алдында шулай ук Татарстан Республикасы Дәүләт Советы депутаты Илшат Әминов, Зәй шәһәре һәм Зәй районы хәрби комиссариатының гражданнарны хәрби хезмәткә әзерләү һәм чакыру бүлеге башлыгы Александр Гурьянов, «Аккурайд уилз Руссиа» ҖЧҖнең тәгәрмәчләр җитештерү цехы башлыгы Андрей Гайнан чыгыш ясадылар. Хәрби хезмәткәрне соңгы юлга барлык хәрби хөрмәтләр белән озаттылар. Солдатны бер минут тынлык белән искә алдылар. Илдар Илдус улын Яңа шәһәр зиратына җирләделәр.Каһарман турында якты истәлек зәйлеләрнең йөрәкләрендә мәңге яшәячәк.