Зәйдә махсус хәрби операциядә һәлак булганнар белән хушлаштылар

Бүген Зәй районы махсус хәрби операциядә катнашучы рядовойлар Захаров Владимир Юрьевич һәм Галишев Евгений Константинович белән хушлашты. Хәрби хезмәткәрләр сугышчан бурыч үтәү барышында һәлак булган. Матәм панихидасы «Энергетик» мәдәният йортында узды. Район башлыгы Р.Г. Кәримов һәлак булганнарның әниләренә, туганнарына һәм якыннарына кайгы уртаклашу сүзләре белән мөрәҗәгать итте. "Хөрмәтле хәрбиләрнең туганнары һәм якыннары! Татарстан Республикасы Рәисе, шәхсән үз исемемнән һәм барлык зәйлеләр исеменнән авыр кайгыгызны уртаклашам. Ватанны саклаучылар турында якты истәлек безнең йөрәкләрдә мәңге сакланыр. Авыр туфраклары җиңел, урыннары оҗмахта булсын!", - диде Разиф Галиевич. Кайгы уртаклашу сүзләре белән шулай ук Татарстан Республикасы Хөкүмәтеннән куратор И.Н. Гущин, Зәй шәһәре һәм Зәй районы хәрби комиссары А.Ф. Әгъләмҗанов чыгыш ясадылар. Хәрбиләрне соңгы юлга барлык хәрби хөрмәтләр белән озаттылар. Солдатларны бер минут тынлык белән искә алдылар. Владимир Юрьевичны Дмитровка авылы зиратында, Евгений Константиновичны Поручик авылында җирләделәр.