Зәй районы Кәрәкәс авылында яңа ФАП ачылды

Агымдагы елның 30 августы Зәй районының Керәкәс авылында яшәүчеләр өчен өчләтә бәйрәм – Шәһәр көне, Татарстан Республикасы көне һәм күптән көтелгән яңа фельдшер-акушерлык пункты ачылу көне буларак истә калачак. Фельдшер-акушерлык пунктын төзү һәм медицина җиһазлары белән тәэмин итү «Сәламәтлек саклау» милли проектын гамәлгә ашыру кысаларында башкарылган. ФАП медицина персоналының нәтиҗәле эшләве өчен барлык кирәкле әйберләр белән тәэмин ителгән. Шуның нәтиҗәсендә авыл халкы диспансерлаштыруның беренче этабы кысаларында сәламәтлекләрен тикшерә, димәк, гомер озынлыгын арттыра алачак. ФАПны ачу тантанасында район башлыгы Разиф Кәримов, район башлыгы урынбасары Петр Уразайкин, Татарстан Республикасы Хөкүмәте кураторы Иван Гущин, Башкарма комитет җитәкчесе Эмиль Галиев, Зәй үзәк район хастаханәсе баш табибы урынбасары Вадим Усманов, Бигеш җирлеге башлыгы Илгиз Вәлиев, авыл халкы катнашты. Кәрәкәс авылында фельдшер вазыйфасында инде 39 ел Рушания Исламова халыкка медицина хезмәте күрсәтә. Шушы еллар эчендә ул үз участогындагы һәркемнең сәламәтлеген өйрәнгән. Авылда фельдшер стратегик характерда. Авыл халкының гомер озынлыгы нәкъ менә аның эшенә бәйле. Ул җирле халыкка ашыгыч ярдәм күрсәтә алучы беренче кеше. Һәм нәкъ менә ул авыл халкының сәламәтлек күрсәткечләрен саклаучы булып тора, аларны чираттагы тикшерү вакытында пөхтәләп теркәп бара. Әлбәттә, җирле халык аңа зур хөрмәт белән карый. Ул район һәм Татарстан Республикасы җитәкчелегенә уңайлы шартларда эшләү һәм яңа заманча җиһазлардан файдалану мөмкинлеге өчен рәхмәт белдерде. Үз эшенә тугры булганы өчен Рушания Исламова район башлыгының Рәхмәт хаты белән бүләкләнде. Әлеге милли проект кысаларында Зәй районында быел Керәкәс торак пунктында төзелеш эшләре башкарылды, ә 7 авылда фельдшер-акушерлык пунктлары ремонтланды.