Авыл игелекле кешеләре белән матур

Туган җиренә, туган авылына мәрхәмәтле кешеләргә карап күңел сөенә. Безнең Суык-Чишмә авылы да кендек каны тамган җирен олылап, хөрмәтләп, кирәк икән ярдәм күрсәтеп яшәүче мөхтәрәм кешеләре белән матур. Күркәм табигатьле туган авылын, үзе шәһәрдә яшәсә дә, онытмыйча, кадерләүче Заһит Абдуллин -шундыйлардан. Аның авылда уңай шартлар булсын өчен кылган гамәлләрен, матди ярдәмен бәяләп бетерерлек кенә түгел. Кайда нинди яхшылык кылына - аңа Заһит кулы тими калмый. 1992 елда Суык-Чишмәдә төзелгән мәчет электр белән жылытуга көйләнгән иде. Узган ел ул аның артыннан йөреп, проект ясатып, мәчетебезне газлы итте. Авылда нәрсә эшләргә белмичә, хезмәт урынсыз калган ир-егетләребезне Әлмәттә үзе эшли торган оешмага эшкә урнаштырды. Яшьләребездә алгы көнгә ышаныч артты, акрынлап йорт-жирләр, каралты-куралап төзекләндерелә башлады. Сабантуйны, авылда үтүче һәр бәйрәмне матур, истә калырлык итеп уздыруга булышлык итә ул.
Без - өлкәннәрне дә һәрдаим игътибар үзәгендә тота Заһит. Өлкәннәр көне уңаеннан 80гә якын кешегә зур-зур азык-төлек пакетлары тапшырды. Менә шулай башкалар турында кайгыртып, авылны даими ярдәменнән калдырмыйча, безне сөендереп яшәүче бу кешегә газета аша рәхмәтебезне белдерәбез. Без - өлкәннәр аның, гаиләсенең исән-сау, имин яшәвен теләп догаларыбыздан калдырмыйбыз. Аңа эшендә, тормышында зур уңышлар телибез. Безгә, авылга кылган изгелекләре үзенә меңе белән әйләнеп кайтсын. Казан эшмәкәре, Суык-Чишмә егете Заһит Кәлимуллин да өлкәннәргә чәй таратты.