Зәй шәһәрендә яшәүче как һәм кәнфитләр ясау буенча үз бизнесен ачты
2024 елның 12 апрелендә узган Бөтенроссия эшкә урнаштыру ярминкәсенең төбәк этабы кысаларында Дилбәр Сәитова «Кече бизнес-зур перспективалар» мәйданчыгында кәнфитләр ясау буенча кызыклы мастер — класс күрсәтте. Дилбәр Зәй шәһәренең халыкны эш белән тәэмин итү үзәге ярдәмендә «Кече һәм урта эшкуарлык һәм шәхси инициативага ярдәм» милли проекты буенча үз эшен үстерүгә бер тапкыр бирелә торган финанс ярдәме ала. Зәйдә яшәүче яшь хатын-кыз җиләк-җимеш чипсы, как, изомальттан кәнфитләр ясый. Тәм-томнарны беренче бәяләүчеләр-улы Азат һәм кызы Әминә. Нигездә ул аларның сәламәтлеге турында кайгыртып, бу бизнеска керешә. Яшь әни башта гаиләне сөендерергә, якыннарын консервантлар, шикәр, буяулар кушмыйча файдалы җиләк-җимеш чипсы белән сыйларга тели. Дилбар продукциясен дуслары һәм туганнары сынап карый, һәм әкренләп аңа кызыксыну күрсәтә башлыйлар һәм продукцияне үзләре белән дә бүлешүен сорыйлар. Заказлар да килә башлый. Тиздән тәмле һәм файдалы ашау бизнесы да барлыкка килә. «Ярты ел чамасы җиләк-җимеш кагы һәм чипсы ясау белән шөгыльләнәм. Элек торт пешерү белән мавыктым. Балалар үсеп җиткәч, гаиләнең ашау гадәтләрен үзгәртергә һәм тәм-томнарны файдалы нәрсәгә алыштырырга кирәклеген аңладым. Как һәм чипсада тукталдым, аларны үзең белән юлга алып китү, төшке ашка кадәр ашау уңайлы. Ирем миңа кечкенә киптергеч бүләк итте. Вакыт узу белән җиләк — җимешне туңдыру һәм әзер продукцияне саклау өчен профессиональ җиһазлар — дегидратор, блендер һәм суыткыч — халыкны эш белән тәэмин итү үзәгеннән бер тапкыр бирелә торган финанс чаралары ярдәмендә сатып алдым. Мин онлайн курсларда укыдым, мастер-классларны әле дә карыйм. Озак вакыт сынап карадым, идеаль нәтиҗәгә ирештем, тикшерелгән рецептларга тукталдым. Продукциянең зәвыгына һәм сыйфатына тулысынча ышангач, аны социаль челтәрләрдә сатуга чыгарырга булдым,» - дип уртаклаша үзмәшгуль. Җиләк-җимеш сатып алудан алып әзер продукцияне төрүгә кадәр, ул бөтен процессны үзе башкара. Җәй көне алма, җиләк, кишер, кура җиләге җыя, бары тик сыйфатлы җиләк-җимеш кенә сатып ала. Үзмәшгуль хатын сүзләренчә, киптергәндә билгеле бер температура режимында барлык туклыклы үзлекләре һәм витаминнары, җиләк-җимешнең төсе һәм тәме саклана. «Аш бүлмәсендә пешергәндә мин зур ләззәт һәм зур энергия алам", - ди Дилбәр. Дилбәр Сәитова авыл хуҗалыгы ярминкәләрендә, район һәм республика Сабантуйларында, Питрау көне, Казан, яшьләр көне бәйрәмнәрендә актив катнаша. «Минем планнарымда җитештерүне һәм ассортиментны киңәйтү. «Кече һәм урта эшкуарлык һәм шәхси инициатива ярдәме» милли проекты ярдәмендә финанс ярдәме белән үз хыялын тормышка ашыра алуыма мин бик шат», - ди Дилбәр.