Зәйлеләр Җиңү көненә багышланган тантаналы чарада катнашты
Бүген Казанда М.Җәлил исемендәге Татар опера һәм балет театрында Бөек Ватан сугышында Җиңүнең 79 еллыгына багышланган тантаналы чара узды. Тантанада ТР Президенты Рөстәм Миңнеханов, ТР Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин, ТР Премьер-министры Алексей Песошин катнашты. Кунаклар арасында ветераннар һәм тыл хезмәтчәннәре, хәрби хезмәткәрләр бар иде. Әлеге чарада Зәй муниципаль районыннан район башлыгы Р.Г. Кәримов җитәкчелегендәге делегация катнашты. Делегация составында хәрби комиссар Айрат Әгъләмҗанов, район башкарма комитеты җитәкчесенең социаль мәсьәләләр буенча урынбасары Светлана Ревина, район ветераннар советы рәисе Алексей Алексеев, “Сугышчан туганлык” иҗтимагый оешмасы рәисе, “Ватанны саклаучылар” дәүләт фондының социаль координаторы Сергей Хватков, хәрби махсус операциядә катнашучы Георгий Борисов, һәлак булганнарның ата-аналары Сания Садыйкова һәм Федор Милочкин бар иде. Бөек Ватан сугышы ветераннарын һәм сугыш хәрәкәтләре ветераннарын театр каршындагы мәйданчыкта балалар һәм яшьләр иҗтимагый оешмалары һәм ирекле берләшмәләр активистлары каршы алды. Театр холлында фронт һәм тыл геройларына, Татарстанның Бөек Җиңүгә керткән өлешенә багышланган архив документлары һәм фотосурәтләр күргәзмәсе узды. Тантанада катнашучыларны Татарстан Республикасы Рәисе сәламләде. Рөстәм Миңнеханов ветераннарны Җиңү көне белән котлады, аларга ныклы сәламәтлек, җан җылысы, якыннарының кайгыртуын һәм озын гомер теләде. Сугыш кырларында һәлак булган һәм сугыштан соң вафат булган батырларның истәлеге бер минутлык тынлык белән искә алынды. Концерт программасында сугыш чоры җырлары яңгырады, тамашачылар хис-кичерешләрен тыеп тормадылар, күз яшьләре белән әкрен генә кушылып җырладылар һәм һәр чыгышка кул чаптылар. Финалның чыгышы "Җиңү көне" җыры белән тәмамланды, аны бөтен зал башкарды.