Актив тормыш белән яши

«Уңайлы йорт» торак милекчеләре ширкәте юбилейлары булган хезмәт, сугыш ветераннарын даими игътибар үзәгендә тота. Ширкәт рәисе Римма Никифорова бу көннәрдә хезмәт һәм сугыш ветераны Наил Хәйретдиновның хәл-әхвәлен белешеп, 85 яшьлек юбилее белән котлады. Әлеге буын хөрмәтләүгә лаек - алар илгә җиңү таңын якынайтты.
Наил Хәйретдинов Түбән Кама районы Иштирәк авылыннан, мәктәптә VI класстан соң колхоз эшенә ныклап керешкән ул. Яшүсмер яланаяк пар ат белән җир сөргән. 9 яшьтән әнисез үскән. Сугыш елларында бөтен колхоз, хуҗалык эше яшүсмер, яшьләр җилкәсенә кала. Әтисе сугышка китеп, җиңү таңын Берлинда каршылый. Җиңүле кыяфәт белән әти сугыштан кайткан көн иң шатлыклы мизгел булып күңелдә калды, ди ага. Үзе исә 1949 елда армия хезмәтенә алына. Севастопольдә хезмәт итә. Өч ел ярым хезмәт итеп, туган авылына әйләнеп кайта. Энҗүдә атлы кыз белән гаилә кора, 1956 елда Зәйгә Икмәк кабул итү предприятиесе бистәсенә күченеп киләләр. Зәй урман хуҗалыгы, "АТХ-З", төзү-монтажлау идарәсендә машина йөртүче булып эшли. Ике кыз, ике ул үстерәләр. Наил ага ветеран буларак, шәһәрдән ике бүлмәле фатир ала. Әлеге фатирда куанып кына яшисе дә бит, әмма өч ел элек Энҗүдә апа үлеп китә.
-Ялгыз гомер итүе авыр, тол калуны дошманыңа да күрсәтмәсен икән, - ди Наил ага. Аңа Ижауда яшәүче кызы Әлфия кайтып, булышып тора.
-Үз яныма яшәргә чакырам да, барасы килми, - ди кызы Әлфия.
Ага үзенә бер шөгыль булсын дип, балык тотарга йөри.
-Балык капса, капмаса да, яр буенда табигатькә булса да сокланып утырам, ди ага. Ул әле машинасын да үзе иярли.