Энә дә бүләк, дөя дә...

Президентыбыз Рөстәм Миңнехановның “Мәктәбеңә ярдәм ит “ акциясе халык арасында яклау тапты. Җитәкче урында эшләүчеләр яки эшмәкәрләр генә түгел, теләгән һәр кеше булдыра алган кадәр үзе укып чыккан мәктәпкә ярдәм итәргә тырышты. Безнең Аксар авылында андыйлар шактый булды. Әйе, мәктәпне яңа уку елы алдыннан төзекләндерү, тәртипкә китерү, матурлау, өстәл-идәннәрне буяу кебек эшләрне башкару өчен аларның ярдәме бик тә кирәк иде. Менә алар кемнәр: Рәис Шәйхиев, Илфат Әшрәпов, Рушат Шәйхиев, Илсур Гатин, Илнур Нуруллин, Раушан Тәхаутдинов, Гамир Гайнетдинов, Марат Мингалин, Марат һәм Айдар Галимовлар, Юлдаш Мирсәев, Ирек Хөснетдинов, Илдус Шәвәлиев, Лилия Нургалина, Юрий Гыйльманов.
Көзге яңгырларда, кышкы бураннарда уңайлы булсын өчен хакимият тарафыннан җылы бәдрәф эшләнде. Стеналарына плитәләр ябыштырылып, яңа унитазлар, юынгычлар куелды.
Халыкта “энә дә бүләк, дөя дә бүләк” дигән әйтем бар. Чын йөрәктән бирелгән ярдәм бик тә кадерле. Ә укучы балаларга абый-апаларына рәхмәт әйтеп, кадерләрен белеп, тырышып укып, яңа уңышларга ирешүләрен телисе килә.