Зәйдә Авыл хуҗалыгы комплексларының язгы кыр эшләренә әзерлеген кабул иттеләр

Бүген районның авыл хуҗалыгы бүлекчәләрендә иртәнге сәгать 7дән район башлыгы Р.Г. Кәримов җитәкчелегендә техниканың язгы кыр эшләрен башкаруга әзерлеген кабул итү буенча комиссия эше башланды. Район хуҗалыкларында авыл хуҗалыгы техникасын ремонтлау тулысынча тәмамланган. Кабул итү «Нива»ПК хуҗалыгыннан башланды. Көн дәвамында комиссия әгъзалары «Восток», «Зәй шикәре», «Зәй» агрофирмалары, «Союз-Агро» ҖЧҖ бүлекчәләрендә тракторларның һәм авыл хуҗалыгы машиналарының әзерлеген тикшерделәр. Графикка барлыгы 8объект кертелгән иде. Техникалар бер рәткә тигез итеп тезеп куелган. Комиссия әзерлек дәрәҗәсенең түбәндәге критерийлар буенча бәяләү күрсәткечләренә таянды: тракторларның техник караудан узуы, күчмә ремонт звенолары булу, техник хезмәт күрсәтү пункты эше, хезмәтне саклау буенча расланган инструктажлар, кабинет һәм хезмәтне саклау буенча документлар булу, барлык технологик процессларны үтәү, орлык материалының әзерлеге. Шулай ук техниканы кабул итү барышында комиссия әгъзалары механизаторлар алдында чыгыш ясадылар, куркынычсызлык техникасын үтәүнең мөһимлеген, хезмәт хакын бәяләүне, язгы кыр эшләрендә мәшгуль эшчеләрне матди стимуллаштыру чараларын аңлаттылар. Районда 2023 елның язгы кыр эшләрен башкаруга төрле маркалы 300 трактор әзерләнгән, шуларның 55е аеруча көчле техникалардан санала. Конкурс нәтиҗәләре буенча 1 урынны «Зәй шикәре» АФ ҖЧҖ «Сәвәләй» ПК, 2 урынны «Союз-Агро» ҖЧҖнең «Кузайкин РПК»сы (Гулькин авылы), 3 урынны «Восток» АФ ҖЧҖнең «Баграж» ПКсы һәм «Зәй» АФ ҖЧҖ"нең Аксар" ПКсы бүлештеләр.