Зәйдә Алексей Агашкинны соңгы юлга озаттылар

Бүген Зәй халкы махсус операция вакытында һәлак булган кече сержант Алексей Иванович Агашкинны соңгы юлга озатты. Ул хәрби бурычын намус һәм батырлык белән үтәде, ахырга кадәр хәрби антына тугры калды һәм үз исемен мәңгегә тарихка язды. Матәм тантанасы «Энергетик» мәдәният йортында узды. Россия Федерациясе Президенты Путин Владимир Владимирович, Татарстан Республикасы Раисе Миңнеханов Рөстәм Нургали улы һәм барлык зәйлеләр исеменнән, район башлыгы Кәримов Разиф Гали улы Агашкиннар гаиләсе, аларның якыннары һәм туганнарының авыр кайгысын уртаклашты, курку белмәс- герой ул үстергәннәре өчен ихлас күңелдән рәхмәт белдерде. Шулай ук кайгы уртаклашу сүзләрен Татарстан Республикасы Хөкүмәте кураторы Гущин Иван Николаевич, Зәй шәһәре һәм Зәй районы хәрби комиссары, подполковник Әгъләмҗанов Айрат Фоат улы да җиткерде. Солдатны бер минут тынлык белән искә алдылар. Россия Федерациясе Президенты Указы нигезендә хәрби бурычын үтәгәндә күрсәткән батырлыгы һәм фидакарьлеге өчен кече сержант Алексей Иванович Агашкин үлгәннән соң Батырлык ордены белән бүләкләнә, аны район башлыгы Кәримов Разиф Гали улы Алексейның әти-әнисенә тапшырды.