«Үсеш ноктасы» үзәге - заманча белем бирүнең инновацион мөмкинлекләре

«2 нче Зәй урта гомуми белем бирү мәктәбе» базасында «Үсеш ноктасы» табигать белеме һәм технология юнәлешләре үзәге эшләвен дәвам итә, аның эшчәнлеге кысаларында «Яшь дизайнер», «Яшь галим», «Робототехника», «Цифрлы гигиена», «Компьютер технологияләре» түгәрәкләре эшли. Түгәрәк дәресләре нәтиҗәләре булып балаларның мәктәптә үткәрелгән барлык чараларда, интеллектуаль-танып белү уеннарында, мәктәп конкурсларында һәм төрле дәрәҗәдәге конкурсларда активлыгы тора. «Үсеш ноктасы» үзәге Чаллы шәһәренең «Кванториум» балалар технопаркы белән тыгыз хезмәттәшлек итә. Челтәрле хезмәттәшлек турында килешү нигезендә мобиль Кванториум укытучылары 2023 елның февралендә 6-7 сыйныф укучылары өчен мастер-класслар сериясен үткәрделәр. Укучылар 3D-модельләштерү нигезләре белән таныштылар һәм 3D-каләмнәр ярдәмендә брелоклар, значоклар ясадылар. «Промробо» юнәлешендә укучылар LEGO Spike Prime базасында хәрәкәтчән манипулятор җыюны кызыксынып үзләштерделәр. Һәркем үзен инженер-конструктор һәм дизайнер буларак сынап карый алды. 2нче мәктәп директор урынбасары Айгөл Сөләймановна Абдуллина билгеләп үткәнчә: «Технопарк вәкилләре үткәргән мастер-класслар мәктәп укучылары өчен шатлыклы вакыйга булды. Балалар югары технологияләр дөньясында булудан бик нык тәэсирләнделәр». Технопарк белән тыгыз хезмәттәшлек укучыларга төрле кызыклы чараларда һәм проектларда катнашырга, теоретик белем һәм практик күнекмәләр алырга мөмкинлек бирә. Ата-аналар фикеренчә, «Үсеш ноктасы» үзәк базасындагы түгәрәкләргә йөрү һәм «Кванториум» балалар технопаркы оештырган төрле чараларда катнашу балаларга потенциалны ачарга һәм үз мөмкинлекләрен тормышка ашырырга ярдәм итә.