Токранова Арина - V халыкара Җәлил укулары әдәби бәйгесе җиңүчесе

17 нче февраль көнне Казанның "Сәйдәш" мәдәният үзәгендә V халыкара Җәлил укулары әдәби бәйгесенә йомгак ясалды. Быелгы Җәлил укуларында 40 меңнән артык кеше катнашып, 23 телдә шигырьләр сөйләнелгән. Шулар арасыннан 836 катнашучы финалга чыкты. Финалистлар арасыннан иң лаеклыларын сайлап, 115 катнашучыга беренче, икенче һәм өченче урыннарны тапшырдылар. Җәлил укуларында безнең Зәй шәһәре “Алтынчәч” балалар бакчасыннан Токранова Арина катнашты. Ул Муса Җәлилнең "Кызыма" дигән шигырен өч телдә сөйләде һәм нәтиҗәдә лаеклы икенче урынны яулады. Аны бәйгегә тәрбиячеләр Рания Уразайкина һәм Гөлфия Тимофеева әзерләде. Арина Казанга бүләкләү тантанасына тәрбиячесе Рания Уразайкина һәм әнисе Вера Николаевна белән барды. Рания Уразайкина бәйрәм турындагы уй - хисләре белән уртаклашты. - Бәйрәмне Бөтендөнья татар конгрессы Милли Шура рәисенең беренче урынбасары - Бөтендөнья татар конгрессы Башкарма комитеты җитәкчесе Шакиров Данис Фәнис улы ачып җибәрде. Ул барлык җиңүчеләрне котлап, аларга яңа уңышлар теләде. Концерт өч өлештән торды. Концертта Муса Җәлилнең шигырьләрен сөйләделәр, күренекле артистларыбыз җырлады, биеделәр. Барысы да бик матур оештырылган иде. Шулардан иң дулкынландыргыч мизгел җиңүчеләргә бүләкләр тапшыру иде. Беренче урыннарны Рамил Төхвәтуллин котлады, икенче урыннарны котлау өчен сәхнәгә Инсаф Абдулла күтәрелде, ә өченче урыннарны Алмаз Миргаязов тәбрикләде. Җиңүчеләрнең һәрберсенә истәлекле дипломнар, чәчәк бәйләмнәре һәм сертификат тапшырылды. Бәйрәм бик матур, җанлы узды. Безнең Арина башка катнашучылар белән танышты, аралашты, алай гына түгел, Вьетнам кызы белән фотога да төшәргә җитеште. Без Казаннан зур горурлык белән кайттык. Башкаларга да катнашыгыз, җиңегез дигән теләктә калабыз, -диде ул.