«Мөмкинлекләре-чикле, сәләтләре- чиксез»

2022 елның 3 декабре, шимбә
1993 елдан 3 декабрь Халыкара инвалидлар көне итеп билгеләнде. Әлеге дата белән бәйле рәвештә декабрь башын инвалидлар декадасы итеп үткәрү традициягә керде. Ункөнлек җәмгыятебезгә янәдән аларга даими игътибар бирү, социаль яклау кирәклеге турында искәртә. 2 декабрь көнне С. Рәфыйков исемендәге Үзәк китапханәдә «Мөмкинлекләре-чикле, сәләтләре- чиксез» дип исемләнгән әдәби-музыкаль кичә узды. Чарага инвалидлар һәм Бөтенроссия сукырлар җәмгыятьләре әгъзалары, «Радость» халыкка социаль хезмәтләр күрсәтү үзәгенә йөрүчеләр чакырылган иде. Шулай ук кичәдә Татарстан Республикасының мәдәни мирас объектларын саклау комитеты рәисе Гущин И. Н. һәм Зәй муниципаль районы башлыгы урынбасары Уразайкин П. С. катнашты. Алып баручылар физик мөмкинлекләре чикле кешеләрнең тормыш авырлыкларын җиңеп спорт, рәсем, әдәбият кебек өлкәләрдә үз урыннарын табулары турында сөйләделәр. Нәкъ менә шундый кешеләр һәркем өчен үрнәк булып тора да инде! Китапханә фойесында мөмкинлекләре чикле кешеләрнең «Творение души и рук» дип аталган декоратив-гамәли иҗат күргәзмәсе оештырылды. Шулай ук кичәдә катнашучыларга «Безгә яшәргә яхшылык булыша» дип исемләнгән китап күргәзмәсе тәкъдим ителде. Чарада игелек, мәхәббәт һәм бәхет турында шигырьләр һәм җырлар яңгырады. «Кыңгырау чәчәк» балалар бакчасында тәрбияләнүче сабыйлар, балалар сәнгать мәктәбе укучылары һәм Тәслимә Гәрәева башкаруындагы музыкаль номерлар чакырылган кунаклар күңеленә хуш килде.
ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International