Район педагоглары милли белем һәм тәрбия бирү буенча заманча технологияләрне үзләштерә

Бүген Зәй муниципаль районы башлыгы Р.Г. Кәримов катнашында Сарсаз-Баграж төп гомуми белем мәктәбендә мәгариф оешмалары җитәкчеләре өчен "Милли мәгариф һәм тәрбия: нәтиҗәләр һәм үсешнең төп векторлары" темасына семинар үткәрелде. Россия Федерациясе һәм Татарстан Республикасы законнары нигезендә күпмилләтле Зәй районында мәгариф системасын үстерүнең мөһим үзенчәлеге – мәктәпкәчә һәм гомуми белем бирүдә милли мәгарифнең аерылгысыз системасын булдыру. 2022-2023 уку елында милли бүлек эшенең өстенлекле эш юнәлешләре информацион технологияләр үсешенең хәзерге шартларында милли белем бирү сыйфатын күтәрү; туган телдә өзлексез белем бирү системасын булдыру һәм мәгариф системасын модернизацияләү шартларында әхлакый, сәламәт шәхес тәрбияләү; туган телдә эшләүче тәрбия һәм белем бирү учреждениеләре (төркемнәре) челтәрен саклау һәм үстерү; балаларны, аларның ата-аналарын дәүләт телләрен өйрәнүгә этәрүдән гыйбарәт. Семинарда куелган бурычларны үтәү өчен, мәгариф оешмалары җитәкчеләре, укыту эшләре буенча директор урынбасарлары, татар теле һәм әдәбияты укытучылары белән заманча педагогик технологияләрне практикада өйрәнү һәм куллану өстендә эш алып барылды. Докладлар белән мәгариф идарәсе җитәкчесе Сәфәргалиев Э.Р., Сарсаз-Баграж мәктәбе директоры Мартемьянов В.И., Кадер мәктәбе директоры Исламова Р.С., Югары Налим мәктәбенең татар теле һәм әдәбияты укытучысы Галиуллина Н.Я. чыгыш ясады. Сүз милли мәгариф һәм тәрбиядә нәтиҗәләр, дәресләрдә һәм класстан тыш чараларда укучыларның иҗади сәләтләрен үстерү, милли кыйммәтләр нигезендә шәхесне укыту һәм тәрбияләү, милли тәрбия һәм белем бирү эшендә мәктәпкәчә белем бирү учреждениеләренең роле турында барды.