Район сынау кишәрлекләрендә көзге культураларның торышы тикшерелде

2012 елның 26 апрелендә «Татарстан Республикасы буенча селекция казанышларын сынау һәм саклау буенча Россия Федерациясе дәүләт комиссиясе» ФДБУнең Зәй районы Сәвәләй авылында урнашкан филиалында көзге бодайны һәм көзге арышны кышлату буенча көзге культураларның тәҗрибә кишәрлекләрен тикшерү үткәрелде. Дәүләт сорт сынавы нәтиҗәләренең объективлыгын арттыру һәм филиалның эш сыйфатын бәяләү максатыннан комиссия төзелде. Комиссия рәисе - «Госсорткомиссия» ФДБУнең ТР филиалы башлыгы И.Р. Гәрәев. Комиссия составына Татарстан Республикасы Авыл хуҗалыгы һәм азык-төлек министрлыгы һәм «Татарстанның элиталы орлыклары» ассоциациясе вәкилләре, «Россельхозцентр» ФДБУнең Татарстан Республикасы филиалының орлыкчылык буенча җитәкчесе урынбасары Р.Р. Хәбибуллин, ТатНИИСХның әйдәүче фәнни хезмәткәре, авыл хуҗалыгы фәннәре кандидаты И. Д. Фадеева, «Россельхозцентр» ФДБУнең Татарстан Республикасы филиалы Зәй районы бүлеге башлыгы З.Э. Тәхаутдинова, Зәй дәүләт сорт участогы мөдире Р. И. Рябов керде. Катнашучылар агымдагы елда сорт сынауларында булган көзге бодай һәм көзге арыш чәчүлекләрен карадылар, барлыгы 42дән артык тәҗрибә кишәрлеге каралды, шулардан 27се - көзге бодай, 15е - көзге арыш кишәрлеге. "Сорт участокларында көзге культураларның – бодайның һәм арышның яңа сынала торган сортлары тәҗрибәләре салына. Алга таба алар «Госсорткомиссия» ФДБУ тарафыннан Россия территориясендә куллануга рөхсәт ителгән селекция казанышлары реестрына кертү өчен тәкъдим ителәчәк. Сорт участокларында сан һәм сыйфат күрсәткечләре буенча иң яхшы сортлар ачыклана: клейковина, аксым, уңыш һәм башкалар. Соңыннан алар районлаша» - ди З.Э. Тәхаутдинова. Тикшерү нәтиҗәләре буенча комиссия көзге культураларның торышына уңай бәя бирде, кышлату уңышлы узды. Сорт сынаулары авыл хуҗалыгы культураларының дәүләт сорт сынавы методикасы нигезендә салынган; сортларны тәҗрибә кишәрлекләрендә урнаштыру саклана, ара калдырылган, баш-башларында һәм ян саклау урыннары бар, һәр сорт номер этикеткасы белән билгеләнгән. ГСУ хезмәткәрләренә сорт тәҗрибәсе эшен дәвам итәргә тәкъдим ителде.