"Тукай әкиятләрен барлап"

"Тукай әкиятләрен барлап". Балалар китапханәсендә бөек татар шагыйре Габдулла Тукайның туган көненә багышлап үткәрелгән әдәби программа әнә шулай дип аталды. Бәйрәм чарасына «Тату гаилә» һәм «Теремкәй»балалар бакчаларында тәрбияләнүче сабыйлар чакырылган иде. Менә инде бер гасырдан артык балалар яраткан шагыйребезнең әсәрләрен кызыксынып укый һәм яттан сөйлиләр. Бүген дә алар бик теләп Тукайның «Бала белән күбәләк», «Кызыклы шәкерт»шигырьләре буенча кечкенә сәхнәләштерүләр күрсәттеләр. «Теремкәй» балалар бакчасы нәниләре кәҗә белән сарык турында әкият буенча күренеш тәкъдим иттеләр. Кечкенә артистларның чыгышы өлкәннәрнең дә, балаларның да күңеленә хуш килде. Чарада һәр баланың яраткан персонажы Шүрәле дә катнашты. Ул инде күптәннән беркемгә дә, беркайчан да явызлык китерми торган игелекле зат, кунаклар белән уйнап күңел ачты. Аннары сабыйлар бик теләп Тукай табышмакларына җаваплар эзләделәр. Шагыйрь калдырган мирасның әһәмияте әйтеп бетергесез. Әсәрләренең туган якка, аның табигатенә тирән мәхәббәт белән сугарылуы, балаларда туган җиргә мәхәббәт тәрбияләве, тырыш хезмәтнең кадерен белергә өйрәтүе мөһим. Очрашу, гадәттәгечә, һәркемгә таныш «Туган тел» җыры белән тәмамланды. Барлык катнашучылар иганәчедән истәлеккә бүләкләр алдылар һәм бердәм фотога төштеләр.