Зәйлеләр Г. Тукайның туган көнен билгеләп үттеләр

Г.Тукай - бөек татар шагыйре. Тукай абыебыз 26 апрельдә — матур яз көнендә, кошлар җылы яклардан әйләнеп кайткач, умырзая чәчәкләре башларын калкыткач дөньяга килгән. Кызганыч ки, ул бик яшьли үлсә дә, аның әсәрләре — озын гомерле булалар. Шул кыска гомерендә ул кайберәүләр 100 елда да үтәп чыга алмаслык эш башкарырга өлгерә. Күрәсең, кеше аз гына яшәп тә гаять зур эш эшләргә, шул хезмәтләре белән халык күңеленә кереп калырга мөмкин икән. Тукай - әнә шундыйлардан. Тукай безгә якын, кадерле, ул һәрчак безнең күңел түребездә. Бөек Тукайны искә алу өчен 26 нчы апрельдә “Энергетик” мәдәният йорты каршында зур бәйрәм үтте. Бәйрәмгә Зәй районы һәм шәһәренең мәктәп укучылары, “Адымнар” коллективы килгән иде. Тукай исән. Җыры күңелләрдә, Яшәсәк тә үзен күрмичә. Тукай килә моңлы сазын уйнап, Шагыйрьләргә тынгы бирмичә,- дигән шигъри юллар белән “Адымнар” коллективы җитәкчесе Миннекаев Фәннур Галимҗанович бәйрәмне ачып җибәрде. Ул укучыларны Габдулла Тукайның тормыш юлы белән таныштырып узды. Сәхнәдә яраткан шагыйребезнең бик күп шигырьләре биюләр, җырлар белән үрелеп барды. Бәйрәмдә 2 нче мәктәпнең “Умырзая” театр коллективы шагыйрьнең “Эш беткәч уйнарга ярый” шигыре сәхнәләштереп күрсәтте. 4нче мәктәпнең Урамова Владаның “На русской земле”, Чыбыклы мәктәбенең Әфләтунов Илгиз сөйләгән “Кәҗә белән Сарык” әкияте, Ситникова Раиләнең “Национальные мелодии”(1нче мәктәп), Шайдуллин Айнар белән Ибрагимов Әмирнең “Кызыклы шәкерт” шигыре (“Ләйсән” балалар бакчасы), Сөнгәтуллина Нәзиләнең “Шаян песи” (7 нче мәктәп), 6нчы мәктәп укучысы Москова Софиянең “Ласточка” шигыре укучыларның күңелен яулап алды. Габдулла Тукайның туган көне татарларның Гимны булган “Туган тел” җыры белән тәмамланды.